Wat sal ek sê?

Soms, as ek sit om vir julle 'n oordenking vir die dag te skryf, staak my gedagtes. Ek kan nie aan enigiets dink wat ek vir julle wil sê nie... maar wag, “wat ek vir julle wil sê nie”? Dit gaan hier nie oor my nie, oor my idees en verbeelding nie! Ek is net die boodskapper en moet dit sê wat God sê!

Toe dit weer vir my duidelik word, word ek nederig en praat met die Here. Ek maak Sy Woord oop en lees wat Hy vir my te sê het. My woord is net 'n eenvoudige menslike woord, maar Syne het mag en kreatiewe krag! Het een mens dit nog ooit reggekry om met sy woord iets te skep, al is dit ook hoe klein? Maar Sy Woord het die hele wêreld geskep, en alles wat daarop is!

Iemand wat goed met woorde kan omgaan en baie Bybel kennis het is nie noodwendig ook 'n goeie predikant nie – 'n goeie predikant is eerstens 'n goeie luisteraar, wat God se Woord hoor, wat 'n enge verhouding met God het en dit wat hy hoor ook kan verder gee.

Hoe dikwels ondervind ons 'n ingewing om van God te vertel, maar ons meen dat ons te jonk is, ons kan nie goed genoeg praat nie, ons is nie belangrik genoeg nie, of wat ook al....

Miskien het jy nog nooit agter 'n preekstoel gestaan nie, miskien skryf jy nie oordenkings nie – en tog voel jy gedwing om van jou geloof oor God te vertel, of dit aan familie, aan bekendes, in die skool of by die werk is. Al die verskonings wat jy dan wil uitdink, weet God reeds, maar Hy wil en sal die woorde in jou mond lê, as jy bereid is om jou mond oop te maak.

Hy is die Een wat by die skepping gepraat het, Hy het met Israel gepraat en Hy praat vandag nogsteeds met ons. En Hy sal ook praat wanneer ons eendag voor Sy hemelse troon staan. Net Sy Woord tel, nie dit wat ons, ons uitdink nie.

Wanneer het jy die laaste keer Sy Woord gehoor? Wanneer en aan wie het jy dit verder vertel?

Ek wens julle 'n geseënde dag toe met 'n hart wat luister.

Rainer Gigerich